فیس بک میسنجرکا سکرین شیئرنگ فیچر متعارف|Facebook Messenger Introduces Screen Sharing Feature

فیس بک میسنجر ایپ میں اب ویڈیو چیٹ اسکرین کو شیئر کرنے کا فیچر متعارف کردیا گیا ہے۔ فیس بک کی جانب سے بیان کے مطابق آئی او ایس اور اینڈرائیڈ موبائل ایپس میں میسنجر ویڈیو کالز کے لیے اسکرین شیئرنگ فیچر کا اضافہ کردیا گیا ہے۔

میسنجر ویڈیو کال کے دوران جب کسی اسکرین کو شیئر کیا جاتا ہے تو صارف مختلف کام جیسے اپنے دوست کے ساتھ کیمرا رول سے اسکرول یا اکٹھے سوشل میڈیا سرفنگ کرسکتے ہیں۔

فیس بک صارفین ویب اور ڈیسک ٹاپ پر میسنجر رومز میں 16 افراد کے ساتھ بھی اسکرین شیئر کرسکتے ہیں جسے جلد 16 سے بڑھا کر 50 کردیا جائے گا، جبکہ صارف کو اسکرین کے حوالے سے مزید کنٹرول بھی دیا جارہا ہے۔

اسکرین شیئرنگ کا فیچر ورک پلیس رومز کے لیے بھی دستیاب ہوگا۔

خیال رہے کہ کمپنی کی جانب سے میسنجر رومز فیچر رواں سال مئی میں پیش کیا گیا تھا جو دنیا بھر کے صارفین کے لیے دستیاب ہے۔

میسنجر روم میں 50 افراد ایک وقت میں ویڈیو چیٹ کرسکتے ہیں اور یہ زوم جیسا ویڈیو چیٹ ٹول ہے جو دنیا بھر میں کورونا وائرس کی وبا کے نتیجے میں ویڈیو کالز کی شرح میں اضافے کو دیکھتے ہوئے متعارف کرایا گیا۔

میسنجر روم میں ویڈیو چیٹس کے لیے وقت کی کوئی حد مقرر نہیں اور لوگ کسی فون یا کمپیوٹر پر کسی بھی چیٹ کا حصہ بن سکتے ہیں اور اس کے لیے فیس بک اکاؤنٹ کی بھی ضرورت نہیں۔

فیس بک کے مطابق میسنجر روم میں پرائیویسی کا خیال اور اسے محفوظ بنانے کے لیے کچھ اقدامات کیے گئے ہیں۔

میسنجر روم کو بنانے والے اس روم یا چیگت کو لاک کرسکتے ہیں تاکہ غیرضروری افراد اس کا حصہ نہ بن سکیں، اسی طرح چیٹ میں شامل لوگوں کو نکال یا بلاک کرسکتے ہیں اور فیس بک کے اصولوں کی خلاف ورزی پر صارفین کی رپورٹ کرسکتے ہیں۔

کمپنی کا کہنا تھا کہ آپ میسنجر روم کو فیس بک اکاؤنٹ سے استعمال کریں یا مہمان کے طور پر اس کا حصہ بنیں، ہم آڈیو یا ویڈیو کالز کو سن یا دیکھ نہیں سکتے۔

فیس بک انتظامیہ نے کہا ہے کہ میسنجر رومز میں مزید فیچرز کا اضافہ آنے والے مہینوں میں کیا جائے گا اور توقع ہے کہ اس سے دنیا بھر کے لوگوں کو ایک دوسرے سے آن لائن جڑنے کا موقع مل سکے گا۔